Զարշաբաթ 1-ը սկսաւ նախաճաշէն ետք՝ մեր ընտրած ամպերով։ Առտուան առաջին ամպերէն ետք Պայթոցարանը հաւաքուեցանք «Բարի Լոյս»ին համար։ Յետոյ աշխատանոցներու համար չորս խումբերու բաժնուեցանք՝ Ակուլներ, Տուկուլներ, Ալնիսներ եւ Բալնիսներ։ Մեր ժամանակացոյցին հետեւելով գացինք օրուան առաջին աշխատանոցներուն։ Ահաւասիկ այս շաբթուան քանի մը աշխատանոցները՝
Զարմանազանին առաջին օրը «Զար Զընգը» երգով արթնցանք եւ նախաճաշէն ետք Պայթոցարանը հաւաքուեցանք։ Նախ Զարմանազանի խումբերուն ծանօթացանք։ Չստլիկներով, մասնակիցներով, չափաներով, ուղեկիցներով, վարագոյրիկներով եւ խոհարարներով՝ միասնաբար կը կազմենք այս գոյնզգոյն աշխարհը։
Զար Զընգը օրը չափաները երգերով, թատրոնով եւ տեսերիզներով ներկայացուցին Զարմանազանը, չորս «զարշաբաթ»ները, «զարօր»երը եւ «զարմանակի»ները։ Ամէն զարշաբաթ կը բաղկանայ 5 զարօրերէ եւ 1 զարմանակիէ։ Զարօրերուն մեր խումբերով տարբեր տեսակի ստեղծարար աշխատութիւններու կը հետեւինք եւ Զարմանակի օրերը միասնաբար զանազան տեղեր պտոյտի կ՚երթանք։
Պայթոցարանէն ետք մեր մտերմուկներու խումբերուն միանալով ընտրեցինք «ամպ»երը։ Ամպերը օրուան մէջ երեք անգամ են եւ այդ պահերն են, երբ խառն տարիքային խումբերով՝ 10-էն մինչեւ 24 տարեկան, միասնաբար ստեղծարար աշխատութիւններ կը տանինք։ Յետոյ վայրին ծանօթացանք եւ զանազան խաղեր խաղացինք։ Կէսօրէ ետք պտտելով մեր շուրջի գեղեցիկ բնութիւնը վայելեցինք։ Վերադարձին մեր խոհարարները համով հոտով ճաշերով դիմաւորեցին մեզ։ Ընթրիքէն ետք հաւաքուելով Պայթոցարանին մէջ խաղալով եւ երգելով հաճելի պահեր անցուցինք ու այսպէսով աւարտին հասաւ մեր առաջին օրը։
Զարմանազանը կը գտնուի Ֆրանսայի Ալպեան լեռներուն ստորոտը՝ Ապոնտանս գիւղին մէջ։ Մեր շրջապատը գտնուող լեռներուն բնութիւնը եւ գեղեցկութիւնը կը ներշնչէ մեզ երգելու, նուագելու, նկարելու, գրելու, խաղալու եւ զանազան ձեւերով ստեղծագործելու։
Զարմանազանի տարածքին մէջ գոյութիւն ունին քանի մը վայրեր, ուր կ՚իրականանան աշխատանոցները, հանդիպումները եւ հաւաքական պահերը։
Քարտէզին վրայ կրնաք տեսնել մեր ընդհանուր վայրը։ Ծիր Կաթինը մեր հիմնական շէնքն է, ուր կը գտնուին «Պայթոցարան»ը, «Զարմանաձայն»ը, «Երգի Այգի»ն, «Զմբագրատուն»ը, ճաշարանը, «Չափագնացք»ը եւ «Զարդիպաստան»ը։
«Պայթոցարան»ին մէջ ամէն առտու եւ ամէն իրիկուն հաւաքուելով՝ միասնաբար հաճելի պահեր կ՚անցընենք։
«Զարմանաձայն»ին մէջ կը պատրաստուին Զարմանազանի ձայնասփիւռի կայարանին՝ «Զարմանաձայն»ին հաղորդումները։
«Երգի այգի»ին մէջ տեղի կ՚ունենան երգով, պարով, մտածելով, փիլիսոփայելով լեցուն պահեր։
«Զմբագրատան» մէջ կը պատրաստուի Զարմանազանին թերթը՝ Պատ-ու-հանը։ Հոս տեղի կ՚ունենան նաեւ խորհելով, երազելով, գրելով, կարդալով լեցուն զանազան աշխատանոցներ։
Ճաշարանին մէջ կը հանդիպինք օրը երեք անգամ՝ նախաճաշին, ճաշին եւ ընթրիքին, ուր համով ճաշերը վայելելէն զատ իրարու հետ աւելի մօտէն ծանօթանալու եւ զրուցելու առիթներ ալ կ՚ունենանք։
«Չափագնացք»ը չափահաս մասնակիցներուն վայրն է, ուր իրենց ամբողջ օրը կ՚անցընեն կարդալով, գրելով, զրուցելով եւ քննարկումներ ընելով։
«Զարդիպաստան»ը ուղեկիցներուն հանդիպումներ ընելու վայրն է։ Իսկ օրուան մէջ անոնք կ՚ըլլան «Փեթակ»ին մէջ, որ կը գտնուի Վիշապ շէնքին մէջ։
Հաւնոցէն անցնելով Քնար շէնքը կը հասնինք, ուր կը գտնուին «Զարուեստանոց»ը, «Գրոց-բրոց»ը, «Զարդուկ»ը եւ «Թատրոն»ը։
«Զարուեստանոց»ին մէջ արուեստի զանազան տեսակները փորձարկելու առիթներ կ՚ունենանք։
«Գրոց-բրոց»ին մէջ տեղի կ՚ունենան գրելով, կարդալով, ստեղծագործելով լեցուն աշխատանոցներ։
«Զարդուկ»ին մէջ կը կարենք, կը հիւսենք, պայուսակներ ու խամաճիկներ կը շինենք եւ ձեռային զանազան աշխատութիւններ ընելու առիթներ կ՚ունենանք։
Ահաւասիկ այս հրաշալի վայրին մէջ կը վայելենք Զարմանազանը։
Բարի եկած էք Զարմանազան։
